غلچکي بريد کوونکو په کندهار ښار کې دوه پوليس په ډزو ووژل.
پېښه پرون ماسپښين د کندهار ښار د لسمې امنيتي حوزې اړوند د قوماندو په سيمه کې هغه وخت رامنځته شوه، کله چې دا دوه پوليس په سيمه کې پر دنده بوخت وو.
يوه باوري سرچينه وايي، چې بريد كوونكي په تېښته بريالي شوي دي.
د کندهار د والي وياند صميم خپلواک يوازې د پېښې پخلى کوي.
دا په داسې حال کې ده، چې پرون سهار غلچکي بريد كوونكو د کندهار ښار په نهمه امنيتي حوزه کې هم د ولايت مقام مطبوعاتي سلاکار عبدالغفور فېروز په ډزو وواژه.
د عبدالغفور فېروز د وژنې مسووليت وسله والو طالبانو پر غاړه اخيستى، خو د دوو پوليسو د وژل كېدو په اړه يې څه نه دي ويلي.
