د ملي اردو چارواکي وايي، د ننګرهار ولايت په اچين او نازيانو ولسواليو كې د هوايي بريدونو له كبله ۳۲ داعش وسله والو ته مرګ ژوبله اوښتې ده.
د ننګرهار امنيه قوماندانۍ مطبوعاتي مسوول حضرت حسين مشرقيوال کليد ته وويل، چې تېره شپه د اچين ولسوالۍ په مامند درې او باندر سيمو کې د هوايي بريدونه له كبله د يو قوماندان په ګډون ۲۹ داعش وسله وال وژل شوي او يو بل ټپي شوى دى.
نوموړي زياته كړه، چې د يوه بل هوايي بريد له كبله د نازيانو ولسوالۍ په سپينې ژۍ سيمه کې دوه داعش وسله وال وژل شوي او د هغوى يوه مخابراتي دستګاه هم له منځه وړل شوې ده.
د مشرقيوال په خبره، په يادو بريدونو كې ځاىي خلكو ته هېڅ زيان نه دى اوښتى.
داعش وسله والو تراوسه په دې اړه رسنيو ته څه نه دي ويلي.
