افغانستان ته د پــاکستــان د دوو نظــامــي او پارلماني پلاوو او د دې اوونۍ تر پايه د ای اس ای د مشر سفر او د راغلو پلاوو له خوا لوړپوړو افغان چارواکو ته د پاکستان د سفر بلنه ورکول، د دغو دوو هېوادونو ترمنځ د اړیکو د بیا رغولو یوه هڅه ده. خو افغان حکومت ته په کار ده چې تېرو تجربو ته په پام د یوې مدونې بهرنۍ پالیسۍ په رڼا کې د اړیکو ښه کولو هڅه وکړي او یوازې د پلاوو پر تګ راتګ زړه ونه تړي. دا ځکه چې د تېرو تجربو له مخې مقابل لوري تل پر خپلو کړو ژمنو ژمن نه دی پاتې شوی.