وروسته له هغې، چې د ترکيې جمهور رئيس رجب طيب اردوغان په نوي ډيلي کې د کشمير په مسئله کې د هند او پاکستان ترمنځ د سولې د مذاکراتو لپاره د درېيمګړي وړانديز وکړ، د هند لومړي وزير دا وړانديز رد کړ.
نرېندرا مودي د کشمير مسئله د دوى خپله مسئله بللې او کشمير يې د خپلې خاورې يوه برخه ګڼلې ده.
پرون د هند او ترکيې د مشرانو ترمنځ د ترهګرۍ د له منځه وړلو په هدف يوه هوکړه هم لاسليک شوه، چې له مخې به يې دواړه هېوادونه د ترهګرۍ د ملاتړ کوونکو هېوادونو په ضد ګډه مبارزه کوي.
بل خوا پاکستان د ترکيې د درېيمګړي رول هرکلى کړى او د هر ډول مرستې ژمنه يې کړې ده.
د پاکستان د بهرنيو چارو وزارت په يوه خپره کړې خبرپاڼه کې ويلي، چې د کشمير مسئله بايد د ملګرو ملتونو د پرېکړه ليکونو له مخې حل شي.
