د بدخشان امنيتي چارواکي وايي چې وسله والو طالبانو د دې ولايت زيباک ولسوالۍ نيولې ده.
د زېباک ولسوالۍ د پوليسو مشر سلطان محمد يفتلي رسنيو ته وويل، پوليسو تکتيکي شاتګ کړی او دا مهال په اشکاشم ولسوالۍ کې مېشت شوي دي.
دی وايي اوسمهال د زېباک ولسوالۍ مرکز د طالبانو تر ولکې لاندې دی او افغان ځواکونه له مرکز لېرې سيمه کې له وسله والو طالبانو سره په جګړه بوخت دي.
طالبانو هم خبري رسنيو ته د دغې ولسوالۍ د نيولو خبر ورکړی او ويلی دي چې دا د دوی د پسرلنيو منصوري عملياتو برخه ده .
زېباک ولسوالۍ له مرکز فيض آباده ۱۲۰ کيلومتره لېرې پرته ده چې له پاکستان سره ګډه پوله لري او د بدخشان له خوندي سيمو څخه بلله کېږي.
اوسمهال د بدخشان د يمګان او وردج ولسوالۍ هم د طالبانو تر ولکې لاندې دي.
کلید ګروپ په ټویټر او فیسبوک کې وګورئ
