د ننګرهار والي محمد ګلاب منګل، لوړ پوړو امنيتي مسوولينو، مخورو او ځوانانو تېره ورځ په اچين ولسوالۍ کې له داعش وسله والو څخه تازه پاکو شوو سيمو څخه ليدنه وکړه او د جګړې كرښه کې جنګېدونکي سرتېري يې په نغدو پيسو او مډالونو ونازول.
همدارنګه يادو مسوولينو ته په غني خېلو ولسوالۍ کې د وطنپاله ځوانانو له لوري ځانګړى هرکلى وويل شو.
د ننګرهار ولايت د رسنيو دفتر وايي، چې والي محمد ګلاب منګل امنيتي منسوبينو سره د جمهور رئيس ځانګړى پيغام شريک کړ او د دوى د مېړانې او سرښندونو ستاينه يې وکړه.
هغه زياته کړه، د امنيتي منسوبينو د مېړانې له كبله د شينوارو ولسوالۍ د داعش په قبرستان بدلې شوي او پاتې کسان يې د تېښتې په حال کې دي.
چارواكو هيله څرګنده کړه، چې د اچين ولسوالۍ ټولې سيمې به ډېر ژر د داعش له وحشته پاکې شي.
دا په داسې حال کې ده، چې پرون په يادې ولسوالۍ کې د داعش ډلې دويم مهم پټنځاى هم د حمزه په نوم عملياتو په ترڅ کې له منځه يوړل شو.
