د ملي اردو چارواکي وايي، د ننګرهار ولايت خوګياڼو ولسوالۍ کې يې د شاهين ۲ په نوم پيل کړو عملياتو په مهال ۲۴۵ جريبه ځمکه له کوکنارو پاکه کړه.
په ختيځ کې د ملي اردو د ۲۰۱ سېلاب قول اردو مطبوعاتي مسوول ډګروال شيرين اقا فقيري کليد ته وويل، له تېرو څو ورځو راهيسې يې د ننګرهار په ګڼو ولسواليو کې د کوکنارو اړولو په هدف د شاهين ۲ او ۳ په نومونو ګډ تصفيوي عمليات پيل کړي، چې په ترڅ کې يې تېره ورځ د خوګياڼو ولسوالۍ حکيم اباد سيمه د وسله والو له شتونه پاکه شوه او ۲۴۵ جريبه ځمکه باندې کرل شوي کوکنار يې هم له منځه يوړل.
د فقيري په وينا، په يادو عملياتو کې به يې ګڼ شمېر نورې سيمې هم له وسله والو او كوكنارو پاكې شي.
ملي اردو سږ کال په داسې حال کې د کوکنارو اړولو د کمپاين مشري کوي، چې له دې وړاندې هم ورته کمپاينونه پيل شوي، خو هغه ډول چې مسوولين وينا کوي، هېڅ عملي اقدامات نه تر سترګو کېږي.
