د ننګرهار امنيتي چارواکي وايي، اچين ولسوالۍ کې هدف ته له رسېدو وړاندې دوه ځانمرګي بريد کوونکي ووژل شول.
د ننګرهار د امنيه قوماندانۍ مطبوعاتي مسوول حضرت حسين مشرقيوال کليد ته وويل، تېره ورځ ناوخته د اچين ولسوالۍ په باندر سيمه کې د داعش ډلې دوه تنه ځانمرګي بريد کوونکي، چې په يوه ډاډسن ډوله موټر کې يې چاودېدونکي توکي هم ځاى پر ځاى کول او غوښتل يې د يادې ولسوالۍ د امنيه قوماندانۍ پر ودانۍ بريد وکړي، هدف ته له رسېدو وړاندې د بهرنيو ځواکونو د بې پيلوټه الوتکې له لوري په نښه شول.
نوموړي زياته كړه، په دغه بريد کې د داعش ډلې ډاډسن موټر کې بار ټول چاودېدونکي توکي هم له منځه وړل شوي دي.
داعش وسله والو تراوسه په دې اړه رسنيو ته څه نه دي ويلي.
