ټاکل شوې نن د روسيې په کوربه توب په مسکو کې د افغانستان په هکله درېيمه ناسته جوړه شي.
په دې ناسته کې به د افغانستان او روسيې سربېره د منځنۍ اسيا پنځه هېوادونه، چين، ايران، پاکستان او هند ګډون وکړي او د افغانستان د سولې پروسې په تړاو به خبرې اترې وکړي.
امريکا ته هم په دې غونډه کې د ګډون بلنه ورکړل شوه وه، خو دې هېواد په کې له ګډون انکار کړی دی.
په مسکو کې د افغانستان سفارت انټرفاکس خبري آژانس ته ويلي، چې د مسکو په ناسته کې به د افغانستان د پلاوي مشري د بهرنيو چارو وزارت د پاليسۍ او ستراتيژۍ عمومي رئيس اشرف حيدري وکړي.
په مسکو کې د افغانستان په اړه دا درېيمه غونډه ده چې په کې د سیمې څو هېوادونه د افغانستان په اړه خبرې کوي.
د دې غونډو په لومړۍ هغې کې يوازې چين پاکستان او روسيې برخه لرله او افغانستان له دې کبله چې غونډه کې د ګډون بلنه نه وه ورکړل شوې اعتراض وکړ.
په دويمه غونډه کې يې بيا د افغانستان سربېره ايران او هندوستان ته هم بلنه ورکړل شوه.
کلید ګروپ په ټویټر او فیسبوک کې وګورئ
