په كابل ښار كې نن سهار شاوخوا اته بجې له اداري فساد سره د مبارزې د عدلي او قضايي مركز دوه كار كوونكي وژل شوي دي.
د كابل امنيه قوماندانۍ د جنايي جرمونو د تحقيقاتو رئيس جنرال محمد سالم الماس وايي، چې دغه كسان د نامعلومو وسله والو له لوري د كابل ښار د پنځمې امنيتي حوزې اړوند چهارراهي قنبر سيمه كې ووژل شول.
د هغه په وينا، تراوسه د پېښې انګېزه نه ده معلومه او بريد كوونكي له سيمې تښتېدلي دي.
الماس زياتوي، چې د دغو وسله والو د پېژندلو او نيولو هڅې روانې دي.
تراوسه د پېښې مسووليت چا پر غاړه نه دى اخيستى.
له اداري فساد سره د مبارزې د عدلي او قضايي مركز دغه کار کوونکي په داسې حال کې وژل شوي، چې ياد مرکز تر دې وړاندې يو شمېر لوړپوړي دولتي چارواکي د فساد په تور مجازات کړي دي.
