د ملي اردو چارواکي وایي، د ننګرهار په کوټ او اچین ولسوالیو کې یې د حمزه په نوم پیل کړو عملیاتو په مهال، چې کومانډو ځواکونه یې پرمخ وړي، لسګونو داعش وسله والو ته مرګ ژوبله اوښتې ده.
په ختیځ کې د ملي اردو د ۲۰۱ سېلاب قول اردو مطبوعاتي مسوول ډګروال شیرین اقا فقیري کلید ته وویل، له تېرو څو ورځو راهیسې یې د ننګرهار په کوټ او اچین ولسوالیو کې د حمزه په نوم د کومانډو ځواکونو له لوري عملیات پیل شوي، چې په ترڅ كې يې د هوایي او ځمکنیو بریدونو له كبله ۲۵ داعش وسله وال وژل شوي او لسګونه نور ټپیان دي.
نوموړي زياته كړه، په یادو عملیاتو کې یې ۶ تنه له داعش وسله والو سره د اړیکو په تور نیولي دي.
د فقیري په خبره، دوی هڅه کوي، چې د دغو عملیاتو په مهال په سیمه کې د داعش وسله والو فعالیتونه ختم او هغوى له ماتې سره مخ کړي.
داعش وسله والو تراوسه په دې اړه رسنیو ته څه نه دي ویلي.
