له څه باندې څلور مياشتني ځنډ وروسته نن له پاکستانه خپل هېواد ته د افغان كډوالو د ستنېدو لړۍ بيا پيل شوه.
په اسلام اباد کې د ملګرو ملتونو د كډالو د عالي کمېشنرۍ ويانده دنيا اسلم خان وايي، د دغه بهير د پيل په لومړيو دوه مياشتو کې به د خيبر پښتونخوا ايالت هغه افغان كډوال، چې له وړاندې يې خپل هېواد ته د ستنېدو لپاره نومونه ليکلي، ستانه شي.
د كډوالو او راستنېدونکو چارو وزارت چارواکو ويلي، سږ کال راجستر شوو افغانانو ته، چې له پاکستانه په خپله خوښه افغانستان ته راستنېږي، د ملګرو ملتونو د كډوالو عالي کمېشنرۍ مرستې تر پنځوس فيصده راکمې شوې دي.
د دې وزارت د مطبوعاتي سلاكار حفيظ احمد مياخېل په وينا، سږ کال به د راجستر شوو راستنېدونکو افغان كډوالو هر يو ته د څلور سوه امريکايي ډالرو پر ځاى دوه سوه ډالره ورکړل شي.
تېر ميلادي كال له پاکستانه شاوخوا اووه سوه زره راجستر شوي او ناراجستره افغان كډوال خپل هېواد ته راستانه شوي او افغان حكومت وايي، چې سږ كال به هم له پاكستان څخه افغانستان ته سلګونه زره افغان كډوال بېرته راشي.
