د ننګرهار امنیتي چارواکي وایي، تېره شپه په مومندرې ولسوالۍ کې د افغان ځواکونو او وسله والو ترمنځ په نښته کې ۷ وسله والو طالبانو ته مرګ ژوبله اوښتې ده.
د ننګرهار د امنیې قومندانۍ مطبوعاتي مسوول حضرت حسین مشرقیوال کلید ته وویل، چې تېره شپه د مومندرې ولسوالۍ په لاندې باسول سیمه کې د افغان ځواکونو او وسله والو طالبانو ترمنځ نښته شوې، چې پرمهال یې ۴ وسله وال وژل شوي او درې نور يې ټپیان دي.
نوموړی وایي، په یادو عملیاتو کې افغان ځواکونو او د سیمې خلکو ته هېڅ زیان نه دی اوښتی.
بل لورته د قومندانۍ ویاند زیاتوي، چې پولیسو یې جلال اباد ښار او سرخرود ولسوالۍ کې د بېلا بېلو جرمونو په تور درې تنه له وسلو سره یو ځای نیولي دي.
وسله والو طالبانو تر اوسه پورې په دې اړه رسنیو ته څه نه دي ویلي.
