د عراق پايتخت بغداد کې د ځانمرګي بريد له كبله ۵۰ تنو ته مرګ ژوبله اوښتې ده.
عراقي چارواکو ويلي، چې ځانمرګي بريد كوونكي د بغداد په مرکزي سيمه کې له چاودېدونكو توكو ډك موټر ته د پوليسو مرکز ته څېرمه چاودنه ورکړې ده.
د دوى په وينا، په دې بريد كې ۱۴ تنه وژل شوي او ۳۶ نور ټپيان شوي، چې ډېرى پوليس دي.
تر بريد وروسته امنيتي ځواکونو سيمه کلابنده کړې او د ژغورنې عمليات يې ترسره كړي دي.
د دې خونړي بريد مسووليت داعش ډلې پر غاړه اخيستى.
دغې ډلې په يو خپور كړي بيان كې ادعا كړې، چې په ياد بريد كې څو ټنه بارود کارول شوي دي.
