د ننګرهار ولايتي چارواکي وايي، د بهسودو ولسوالۍ د نجم الدين اخونزاده څلور لارې سيمه کې د کانال ټولي اړوند يوه پوسته باندې تېره شپه شاوخوا اووه بجې د وسله والو طالبانو له لوري بريد شوى، چې له كبله يې پنځو تنو ته مرګ ژوبله اوښتې ده .
د ننګرهار ولايت د رسنيو دفتر څخه کليد ته په رالېږل شوې خبرپاڼه کې راغلي، چې په وژل شويو کې دوه تنه پوليس او دوه نور ملکي وګړي دي او يو بل پوليس ټپي شوى دى .
سرچينه زياتوي، د ځوابي بريد په مهال وسله والو طالبانو ته هم مرګ ژوبله اوښتې، خو کره شمېره يې لا معلومه نه ده .
طالبانو تراوسه په دې اړه رسنيو ته څه نه دي ويلي.
د يادونې ده، چې تر دې وړاندې هم پر يادې پوستې بريدونه شوي وو.
