د ملي اردو چارواکي وايي، د جلال اباد ښار خالص فاميليو کې يې د شاهين ۲۸ په نوم ګډ چاڼيز عمليات پيل کړل.
په ختيځ کې د ملي اردو د ۲۰۱ سېلاب قول اردو مطبوعاتي مسوول ډګروال شيرين اقا فقيري کليد ته وويل، چې نن سهار يې د جلال اباد ښار شپږمې ناحيې اړوند په مولوي خالص فاميليو کې د څلورمې پلې لېوا د شپږم کنډک په مشرۍ له ملي اردو، سيمه ييزو پوليسو او ملي امنيت سره يو ځای د شاهين ۲۸ په نوم ګډ چاڼيز عمليات پيل کړل.
نوموړی وايي، له يادو عملياتو يې موخه په سيمه کې د ورانکاره کړنو مخنيوی او د ډاډمن امنيت راوستل دي.
د جلال اباد ښار په خالص فاميليو کې دا عمليات په داسې حال کې پيل شوي، چې د يو شمېر عامو ولسونو په وينا د حکومت د وسله والو مخالفينو ډېرې کورنۍ په دغه سيمه کې مېشتې دي.
