د ملي يووالي حکومت اجراييه رييس عبدالله عبدالله وايي، په هېواد كې د ګوزڼ يا پوليو ناروغي د ورکېدو په حال کې ده.
نوموړي نن د وزيرانو شورا غونډه كې د خبرو په مهال په دې برخه کې د نړيوالو پر نورو مرستو ټينګار وکړ.
عبدالله وويل، اوس مهال د نړۍ په درېيو هېوادونو کې د پوليو يا ګوزڼ ويروس په بشپړه توګه له منځه نه دى تللى، چې يو يې افغانستان دى.
د نوموړي په وينا، په ټول هېواد کې د روغتيايي رضاکارانو په مټ له امنيتي ستونزو سره، سره د پوليو واکسين تطبيقېږي.
د يادونې وړ ده، چې تېر ميلادي كال په ټول هېواد كې د ګوزڼ ناروغۍ ۱۳ پېښې ثبت شوې وې او سږ كال تراوسه دوه ماشومان په دې ناروغۍ اخته شوي دي.
