جمهور رئيس محمد اشرف غني تېر ماښام د سردار محمد داود خان روغتون بېلابېلې برخې وکتلې.
د ملي دفاع وزارت وايي، چې د سردار محمد داود خان پر روغتون د وسله والو د تېرې ورځې د بريد په پايله کې د روغتون له ٣٠ زيات ملکي ډاکټران، ناروغان او کارکوونکي وژل شوي او شاوخوا ٥٠ کسان ټپيان دي.
د جمهوري رياست مطبوعاتي دفتر څخه خپره شوې خبرپاڼه كې د جمهور رئيس غني له قوله راغلي، هغه ډاکټران او سرتېري به، چې د ټپيانو د نجات لپاره يې فداکاري ښودلې، تقدير شي.
هغه امر كړى، چې ژر تر ژره د روغتون د زيانمنو شويو برخو او تجهيزاتو بشپړ راپور دې برابر شي، چې په رڼا کې يې د سردار محمد داود خان روغتون د بيارغونې عاجل اقدامات وشي.
په ورته مهال اجرائيه رئيس عبدالله عبدالله هم له دې روغتونه ليدنه كړې او د عامې روغتيا وزارت او د ياد روغتون مسوولينو ته يې لارښوونه كړې، چې د سردار محمد داود خان روغتون د بيارغونې لپاره جدي اقدام وكړي.
پر دغه روغتون د بريد مسووليت داعش ډلې پر غاړه اخيستى دى.
کلید ګروپ په ټویټر او فیسبوک کې وګورئ
