د هلمند ولايت ګرمسېر ولسوالۍ کې د افغان ګډو ځواکونو تصفيوي عملياتو کې د دوو قوماندانانو په ګډون ۲۱ وسله وال طالبان وژل شوي او څلور تنه نور ټپيان دي.
د هلمند رسنيو دفتر څخه كليد ته رالېږل شوې خبرپاڼه كې راغلي، چې دا عمليات تېره ورځ د ګرمسېر ولسوالۍ جنوب لور ته خارکو سيمه کې د مخالفينو ځپلو او د کليو تصفيې په هدف ترسره شوي دي.
سرچينې د وژل شويو طالب قوماندانانو نومونه عبدالولي اغا او جان ياد كړي دي.
د سرچينې په وينا، په دغو عملياتو کې ۴۷ حلقې بېلابېل ډول ماينونه، ۲۲ پټې مواضع، درې بابه سل متره د اړيکو خندقونه، يو عراده ټيوټا او يو عراده لوکسل موټرونه په بشپړه توګه تخريب شوي دي.
دغه راز يو ميل پيکا او يو ميل ۱۶ ملي متري وسله امنيتي ځواکونو ترلاسه كړې ده.
په دې عملياتو کې يو امنيتي سرتېرى هم ژوبل شوی دی.
وسله والو طالبانو تراوسه په دې اړه رسنيو ته څه نه دي ويلي.
