د پاکستان په کراچۍ ښار کې له پوليسو سره نښته کې يو وسله وال وژل شوى او څلور نور ژوندي نيول شوي دي.
پاکستاني پوليسو ويلي، ياده نښته پرون ناوخته د کراچۍ په کورنګي ټاون سيمه کې رامنځته شوې ده.
پوليسو ادعا كړې، چې وژل شوي وسله وال د کراچۍ په يو لړ ترهګريزو بريدونو کې لاس درلود.
د دوى په خبره، له نيول شويو کسانو دا مهال پوښتنې ګروېږنې روانې دي.
د وژل شوي وسله وال نوم دلدار او د لښکر جنګوي ډلې غړى ښودل شوى دى.
بايد ياده شي، چې په پاکستان کې تر ضرب عضب عملياتو وروسته د ردالفساد په نوم عمليات پيل شوي، چې تر دې مهاله په كې د سلګونو وسله والو د وژلو ادعا شوې ده.
