عراقي ځواکونه له پنځو ورځو سختو ځمکنيو او هوايي بريدونو وروسته د موصل لوېديځې برخې ته ننوتي دي.
د موصل ښار په دغه برخه کې چې د داعش ډلې په ولکه کې وه، پنځه ورځې مخکې عمليات پيل شوي وو.
بل لور ته د عراق لومړي وزير حيدر العبادي ويلي، عراقي هوايي ځواکونو لومړی ځل د سوريې خاروه کې دننه د داعش ډلې پر مرکزونو بمبارۍ کړې دي.
د نوموړي په وينا دغو بريدونو کې د داعش ډلې هغه دوه مرکزونه په نښه شوي، چې دغې ډلې بغداد کې د بمي بريدونو لپاره کارولي وو.
په ورته مهال موصل کې له الوتکو چاپ شوي پيغامونه غورځول شوي او ښاريانو ته په کې د سملاسي بريدونو خبرداری ورکړل شوی دی.
بل لور ته ملګرو ملتونو د موصل لوېديځ کې د ايسارو ملکي خلکو په اړه اندېښنه ښوولې.
