د پاکستان پوځي چارواکو ويلي، له هېواده يې د ترهګرۍ ختمولو لپاره نوي عمليات پيل کړي چې د رد الفساد عمليات نوم ورکړل شوی دی.
د پاکستاني پوځ رسنيز دفتر ويلي، چې د دغو عملياتو هدف په دغه هېواد کې د وسله والو ډلو له منځه وړل دي.
دا هم ويل شوي، چې دغو عملياتو سره به د پولو امنيت هم خوندي شي. پوځي چارواکو ويلي، دغو عملياتو کې به ځمکني، هوايي او سمندري او نور امنيتي ځواکونه برخه واخلي.
د عملياتو له اعلانه مخکې لاهور کې د پاکستان پوځي چارواکو يوه غونډه وکړه. ويل شوي چې پنجاب ايالت کې به دغو عملياتو کې ملېشه ځواک هم برخه واخلي.
د پوځ رسنيز دفتر په اعلاميه کې راغلي، چې د دغو عملياتو په ترڅ کې به دغه هېواد له وسلو او چاوديدونکو توکو پاک شي. پاکستان د هغو کسانو د ويشتلو امر هم کړی چې په ناقانونه توګه له افغانستان ور اوړي.
له دې مخکې پاکستاني پوځ شمالي وزيرستان کې د ضرب عضب په نامه عمليات هم تر سره کړي وو.
کلید ګروپ په ټویټر او فیسبوک کې وګورئ
