د ملي اردو چارواکي وايي، کوټ او هسکه مېنه کې د روانو شاهين ۲۵ عملياتو پرمهال ۳۵ داعش وسله والو ته مرګ ژوبله اوښتې ده.
په ختيځ کې د ملي اردو د ۲۰۱ سېلاب قول اردو مطبوعاتي مسوول جګړن شيرين اقا فقيري کليد ته وويل، چې د کوټ او هسکې مېنې ولسوالۍ په بېلا بېلو سيمو کې د روانو شاهين ۲۵ عملياتو پرمهال د هوايي او ځمکنيو بريدونو له کبله د يوه قومندان حمزه په ګډون ۳۰ داعش وسله وال وژل شوي او ۵ نور يې ټپيان دي.
نوموړی وايي، په دغو بريدونو کې يو ډاډسن موټر او يو ميل دهشکه هم له منځه وړل شوې ده.
فقيري زياتوي، چې د هسکې مېنې ولسوالۍ په ګور ګورۍ سيمه کې يې دوه کړۍ د وسايطو ضد ماينونه هم کشف او له منځه وړي دي.
داعش وسله والو تر اوسه په دې اړه رسنيو ته څه نه دي ويلي.
