فرانسوي پوليسو د يو لړ عملياتو په مهال د يوې شپاړس کلنې نجلۍ په ګډون څلور شکمن ترهګر نيولي دي.
د پاريس يوې استخباراتي ادارې په يو خپور کړي بيان کې ويلي، چې ياد کسان يې په جنوبي ښار مونپيليې کې د پلټونکو عملياتو په ترڅ كې ونيول.
د درېيو نيول شويو کسانو عمرونه د ۲۶ او ۳۳ کلونو ترمنځ ښودل شوي.
چارواکي وايي، دغو کسانو په فرانسه کې ترهګريز بريدونه پلانول، چې ور څخه يې ۷۰ ګرامه ډېر خطرناک چاودېدونکي توکي هم ترلاسه كړي دي.
په فرانسه کې د تېر کال له خونړيو بريدونو وروسته په دغه هېواد کې ګڼ شمېر شکمن کسان نيول شوي دي.
