د غوڅ ملاتړ ماموريت جېټ الوتکو د هلمند په ګرمسېر ولسوالۍ كې د هوايي بريد په ترڅ كې د يو قوماندان په ګډون شپږ وسله وال طالبان وژلي دي.
د هلمند ولايت د رسنيو دفتر څخه نن كليد ته رالېږل شوې خبرپاڼه كې راغلي، چې دا هوايي بريد پرون ماسپښين شاوخوا دوه بجې د ګرمسېر ولسوالۍ په خاركو سيمه كې ترسره شوى دى.
د سرچينې په وينا، په دې بريد كې د طالبانو د يو ځايي قوماندان مولوي نجيب الله مشهور په مدد په ګډون شپږ وسله وال طالبان ووژل شول.
سرچينه زياتوي، چې په ياده پېښه کې د طالبانو يوه دهشکه او ګڼ شمېر نورې وسلې په بشپړه توګه له منځه وړل شوې دي.
سرچينه وايي، چې په ګرمسېر ولسوالۍ کې په تېرو څو ورځو کې لسګونو طالبانو ته مرګ ژوبله اوښتې او امنيتي ځواكونو د هغوى ګڼ شمېر پټنځايونه له منځه وړي دي.
وسله والو طالبانو تراوسه په دې اړه څه نه دي ويلي.
