د ايران د بهرنيو چارو وزارت په افغانستان كې د سختې واورې ورېدنې په ترڅ كې له سلو د زياتو كسانو د وژل كېدو له كبله د افغانستان له دولت او خلكو سره د همدردۍ څرګندولو ترڅنګ له زيانمنو شويو افغانانو سره د مرستې لپاره د تهران د چمتووالي خبر وركړ.
د ايرنا خبري اژانس د رپوټ له مخې، د ايران د بهرنيو چارو وزارت وياند بهرام قاسمي ويلي، ايران د افغانستان د يو ګاونډي او ورور هېواد په توګه چمتو دى، چې له اړمنو افغانانو سره مرسته وكړي.
د هغه په وينا، په افغانستان كې د وروستيو ورښتونو له كبله ګڼو افغانانو ته مرګ ژوبله اوښتې او لسګونه كورونه ويجاړ شوي، چې د طبيعي پېښو په ترڅ كې زيانمن شوي كسان بېړنيو خوراكي او غير خوراكي توكو ته اړتيا لري.
قاسمي زياتوي، تهران چمتو دى، چې د افغانستان هغو سيمو ته، چې د برفكوچونو او نورو طبيعي پېښو له كبله زيانمنې شوي، خپلې مرستې ورسوي.
دا په داسې حال كې ده، چې طبيعي پېښو ته د رسيدګۍ لپاره د دولت وزير ويس برمک د دوشنبې په ورځ د يوې خبري غونډې په مهال وويل، په تېرو ٧٢ ساعتونو کې د هېواد په بېلابېلو سيمو کې د سختو واورو او بارانونو له كبله ١١٩ کسان وژل شوي او ٨٩ تنه نور ټپيان دي.
برمک دغه راز په دې خبري ناسته کې له ٤٠٠ د زياتو څارويو د له منځه تلو خبر هم ورکړ او زياته يې کړه، پر دې سربېره ١٩٠ کورونه ويجاړ او ٢٣ نورو کورونو ته زيان اوښتى دى.
