د يمن پولې ته نږدې په يوه بمي چاودنه کې د سعودي عربستان يو سرتېرى وژل شوى او يو شمېر نور ټپيان دي.
د سعودي عربستان د پوځي چارواکو په خبره، د دغه هېواد سرحدي ځواکونو په جنوبي ولايت جيزان کې ګزمه کوله، چې د سړک غاړې ماين پرې وچاودېد.
دوى وايي، چې په دې چاودنه کې يې يو افسر وژل شوى او يو شمېر نور ټپيان دي.
بايد ياده شي، چې تر يادې پېښې وړاندې د يمن حوثي وسله والو پر سعودي عربستان د توغندويي بريدونو ترڅنګ په ګډو اوبو کې د سعودي پر يوې جنګي بېړۍ ځانمرګى بريد هم كړى و.
سعودي عربستان د ۲۰۱۵ کال له مارچ مياشتې راهيسې په يمن کې د حوثي وسله والو په ضد پراخ هوايي او ځمکني بريدونه پيل کړي دي.
