د ملي اردو چارواکي وايي، د کونړ ولايت په چپه دره کې يې له وسله والو طالبانو سره په نښته کې پنځو وسله والو ته مرګ ژوبله اړولې ده.
په ختيځ کې د ملي اردو د ۲۰۱ سيلاب قول اردو مطبوعاتي مسوول جګړن شيرين اقا فقيري کليد ته وويل، چې پرون يې د کونړ ولايت چپې درې په ګل سرک سيمه کې له وسله والو طالبانو سره نښته کړې، چې پرمهال يې ۲ وسله وال وژل شوي او ۳ نور ټپيان شوي دي.
نوموړى وايي، په دغه نښته کې افغان ځواکونو ته هيڅ زيان نه دى اوښتى.
خو طالبانو تر اوسه په دې اړه رسنيو ته څه نه دي ويلي.
