د هلمند ولايت په سنګين ولسوالۍ كې د افغان امنيتي ځواكونو په هوايي او ځمكنيو عملياتو كې لسګونو وسله والو ته مرګ ژوبله اوښتې ده.
د هلمند له ۲۱۵ ميوند قول اردو څخه كليد ته رالېږل شوې خبرپاڼه كې راغلي، چې دغه عمليات تېره شپه د سنګين ولسوالۍ په يو شمېر سيمو كې ترسره شوي دي.
د سرچينې په وينا، د عملياتو په ترڅ كې د درېيو قوماندانانو په ګډون ۳۲ وسله وال وژل شوي او ۴۰ تنه نور ټپيان دي.
سرچينه زياتوي، چې د عملياتو په مهال په ياده ولسوالۍ كې ۳۰ كړۍ ماينونه هم كشف او شنډ كړل شوي دي.
وسله والو طالبانو تراوسه په دې اړه څه نه دي ويلي.
