په بازارونو کې د زړو بانک نوټونو له زياتوالي د خلكو له شکايتونو وروسته د افغانستان بانك اعلان كړى، چې دغه بانك نوټونه له كوم اضافي لګښت پرته په نويو بدلوي.
د افغانستان بانك وايي، ټول هغه افغاني بانک نوټونه، چې پر مخ يې سريښ يا سريښ لرونکي مواد، ليکل، رسامي او ټاپه وهل شوې اوسي او يا هم په كومه بله بڼه يې ظاهري شکل ته تغير ورکړل شوى وي، بدلوي.
د سرچينې په وينا، خلك كولاى شي دغه ډول بانك نوټونه د روان لمريز كال د كب مياشتې تر وروستۍ نېټې د هېواد په بانكونو كې له كوم اضافي لګښت پرته په نويو بانك نوټونو بدل كړي.
سرچينه زياتوي، تر دې نېټې وروسته د يادو مشخصاتو لرونکي افغاني بانک نوټونه په هېڅ وجه د چلښت او بدلېدو وړ نه دي.
دا په داسې حال كې ده، چې خلك شکايت کوي، چې په بازارونو کې د زړو بانک نوټونو د زياتوالي له كبله په راکړه ورکړه کې له ستونزو سره مخ دي او ځينې صرافان هم دا ډول بانک نوټونه ارزانه پېري.
