په خوست ولايت كې د كركټ لوبې د ۴۰ لوبډلو ترمنځ درې مياشتنۍ سيالۍ تېره ورځ پاى ته ورسېدې.
د خوست د المپيک امريت وياند محمد شاه فضليار وايي، چې دغه لوبې د مرکز خدر پيرانو سيمه کې له تېرو درېيو مياشتو راهيسې روانې وې.
د هغه په وينا، دا سيالۍ د يوې ځايي راډيو له خوا جوړې شوې وې، چې هدف يې د ځوانانو ترمنځ د همغږۍ ټينګول او له نشه يي توکو د هغوى راګرځول وو.
پاىلوبې ته د عبدالله عابد او ځدراڼ ډېنجر لوبډلو لاره پيدا کړې وه، چې ځدراڼ ډېنجر لوبډلې وکولاى شول سيالې لوبډلې ته ماتې ورکړي او اتلولي خپله کړي.
دغو لوبو ته هره ورځ ګڼ شمېر نندارچيان راټولېدل او ژوندى بهير يې له تمويلوونکې ځايي راډيو څخه خپرېده.
