د ميدان وردګو د سيد اباد ولسوالۍ د تنګي سيمې اوسېدونكي شكايت كوي، چې له تېرو دوه ورځو راهيسې دغې سيمې ته ورغلې لاره د امنيتي ځواكونو له لوري تړل شوې او دوى يې له ګڼو ستونزو سره مخ كړي دي.
خو د ميدان وردګو ولايتي چارواكي بيا وايي، دا لاره يې له دې كبله بنده كړې، چې وسله والو مخالفينو پرې له بار وړونكو موټرو پيسې اخيستې.
د دې ولايت د والي وياند عبدالرحمن منګل نن كليد ته وويل، د لوګر ولايتي چارواكو سره يې تر خبرو وروسته د لارې د تړلو پرېكړه وكړه، ترڅو د وسله والو مخالفينو د دغه كار مخنيوى وكړي.
نوموړي زياته كړه، دوى پلان لري، چې د يادې سيمې د امن كولو په هدف هلته عمليات ترسره كړي.
وسله والو طالبانو تراوسه په دې اړه رسنيو ته څه نه دي ويلي.
