جمهور رييس محمد اشرف غني د ملي يووالي حكومت او حزب اسلامي ترمنځ د سولې هوكړې پر تطبيق ټينګار وكړ.
نوموړي، چې نن سهار يې په ارګ كې د سولې عالي شورا د مشر پير سيد احمد ګيلاني د جنازې لمانځه له ادا كولو وروسته خبرې كولې، له حزب اسلامي سره په بريالۍ توګه د سولې بين الافغاني مذاکراتو ترسره كېدو كې د ګيلاني رول مهم وباله.
جمهور رييس غني زياته كړه، چې د سولې د يادې هوكړې تطبيق د ملي يووالي حكومت له وجايبو څخه دى.
په ورته وخت كې د حزب اسلامي يو وياند حشمتالله ارشد وايي، چې د سولې هوکړې عملي کېدو برخه کې هېڅ پرمختګ نه دی شوی.
د هغه په وينا، د ملي يووالي حکومت په رهبرۍ کې خپلمنځي اختلافونو او وېشلو نظرونو د دغې هوکړې عملي کېدل له ننګونو سره مخ کړي دي.
دا په داسې حال كې ده، چې د حزب اسلامي د مركچي پلاوي مشر امين كريم تېره اونۍ په كابل كې خبريالانو ته وويل، چې ډېر ژر به د افغان حكومت له زندانونو د دغه ګوند ۱۰۰ غړي خوشې شي.
