د عبدالله خان تڼي عالي دارالمعلمين تدريسي مرستيال حضرت الله ګهيځ وايي، چې سږ کال يې په مرکز او ولسواليو کې له دارالمعلمينو څخه په ۷ بېلا بېلو رشتو کې څلور سوه شل کسه فارغ کړل، چې ۳۶ يې يوازې نجونې دي. دی زياتوي، (( دا د فارغينو نهمه دوره ده)).
له دارالمعلمينه يوه تن فارغ شوی محصل وايي، چې دوې په دې دوه کلنه موده کې ډېر څه زده کړي او هيله لري، چې په راتلونکي کې د خپل بخش مطابق د استادۍ پاکه دنده پرمخ يوسي.
لکه مخکې مو چې ياده کړه، په فارغو شوو کې نجونې هم وې، نو شميم څانګه هغه محصله ده، چې د فارغينو په نوم لړ کې يې د عمومي اول نمره توب مقام خپل کړی دی.
څانګه وايي، چې فارغ شوي بايد يوازې په دې زده کړو بسنه ونه کړي، بلکې هڅه دې وکړي، چې خپلې زده کړې د ماسټرۍ تر کچې ورسوي.
د دې دارالمعليمين استاد نجيب الله واثق د خپلو فارغو محصلينو له وړتيا خوښي وښوده او وايي، چې د دوی محصلين ښه وړتيا لري.
واثق زياتوي، ((په خوست کې دا دارالمعلمين د پرمختګ په حال کې دی)).
د يادونې وړ ده، چې د عبدالله خان تڼي عالي دارالمعليمين په ۱۳۸۶ کال کې په فعاليت پيل کړی، چې د خوست د مرکز برسېره په اوو ولسواليو کې هم خپلې څانګې پرانيستي.
د معلوماتو له مخې اوس مهال په دې دارالمعلمين کې شاوخوا نهه سوه محصلين په زده کړو بوخت دي.
