ډيورنډ فرضي کرښې ته څېرمه قبايلي سيمې پاړا چنار کې د چاودنې له كبله لسګونو تنو ته مرګ ژوبله اوښتې ده.
پاکستاني رسنۍ وايي، چاودنه نن سهار دکورمې اېجنسۍ د مرکز پاړا چنار په سبزي منډوي کې هغه مهال وشوه، چې د خلکو ګڼه ګوڼه زياته وه.
رسنيو د ځايي چارواکو له قوله ويلي، چې په دې چاودنه کې ۲۱ تنه وژل شوي او تر ٥٠ زيات ټپيان دي.
د پاکستان د پوځ له خوا خپره شوې خبرپاڼه کې راغلي، چې د پوځ او چټک غبرګون قطعې سيمې ته رسېدلي او روغتونونو ته د ټپيانو په لېږدولو کې يې مرسته کړې ده.
ځايي چارواکو ويلي، چې کېداى شي د مرګ ژوبلې کچه له دې لوړه شي.
د يادونې وړ ده، چې تر دې مخکې هم په دې بازار کې څو چاودنې شوي، چې له كبله يې ګڼ شمېر خلکو ته مرګ ژوبله اوښتې ده.
