د پاکستان، روسيې او چين لوړپوړي چارواكي نن په مسكو كې د افغانستان په اړه غونډه كوي.
افغان حکومت د دې غونډې په اړه اندېښنه ښودلې او وايي، دا چې همغږي ورسره نه ده شوې، نو د غونډې په هدف کې ورته ابهام ښکاري.
د بهرنيو چارو وزارت مرستيال وياند خيرالله ازاد وويل، هره هغه غونډه، چې د افغانستان په اړه جوړېږي او د افغان حکومت استازي په کې برخه ونه لري، بريالۍ به نه وي.
د بهرنيو چارو وزارت ترڅنګ ملي شورا هم دا غونډه د ډيپلوماټيکو دودونو خلاف بللې ده.
ياده غونډه داسې وخت جوړېږي، چې په افغانستان کې د روسيې او ايران سفيرانو څو اونۍ وړاندې ويلي وو، چې د خپلو وګړو د خونديتابه او له افغان حکومت سره د روغې جوړې په نيت يې له وسله والو طالبانو سره تماسونه نيولي دي.
