ننګرهار ولايتي چارواکي وايي، پچير اګام ولسوالۍ کې پنځه سوه پاڅونوالو ته لس امنيتي پوستې جوړې او په شرايطو برابر ځوانان په کې ځای پرځای شول.
د ننګرهار ولايت له مطبوعاتي دفتر څخه کليد ته په را استول شوې خبرپاڼه کې ويل شوي، چې د ننګرهار امنيې قوماندانۍ له لوري د پچيراګام ولسوالۍ کوز او بر پچير ساحو کې د سيمې د امنيت ټينګښت او داعش وسله والو ځپلو په موخه د ولسي پاڅون کوونکو لپاره لس امنيتي پوستې په اساسي ډول جوړې شوې.
خبرپاڼه وايي، جوړې شوې امنيتي پوستې په سيمه کې د ګډو امنيتي ځواکونو مسوولينو ، د پچير اګام ولسوال او نورو مسوولينو له لوري د ملي امنيت ادارې موظفينو ته وسپارل شوې.
سرچينه زياتوي، چې نورو پاڅونوالو ته هم د پوستو جوړلو بهير روان دی او تر هغې چې په سيمه کې د ډاډ من امنيت فضا تامين نه شي دغه لړۍ به روانه وي.
