وروسته له هغې، چې د ملګرو ملتونو امنيت شورا د فلسطين په اشغال شويو سيمو کې د يهودي ناقلينو د استوګنځايونو جوړول وغندل او د كار د درولو غوښتنه يې وکړه،اسراييلو د امريکا سفير احضار كړ.
د اسراييلو لومړي وزير بنيامين نتنياهو پرون په تل ابيب کې د امريکا سفير ډينيل شپيرو خپل دفتر ته غوښتى و او په دې اړه يې خپل اعتراض ورته وړاندې کړ.
نتنياهو وويل، چې د امنيت شورا له لوري د يهودي ناقلينو د مېشت ځايونو غندلو تر شا د امريكا د جمهور رئيس بارک اوباما او د بهرنيو چارو وزير جان کېري لاس دى.
د جمعې په ورځ د ملګرو ملتونو امنيت شورا پنځلس غړو هېوادونو د يوې هوکړې له مخې له اسراييلو وغوښتل، چې پر فلسطيني اشغال شوې سيمې دې ژر تر ژره د استوګنځايونو جوړول ودروي.
په رايه اچونه کې امريکا تشه رايه واچوله او وړاندې شوى سند يې ويټو هم نه کړ.
