د ننګرهار امنيتي چارواکي وايي، تېره شپه په سرخرود ولسوالۍ کې د افغان ځواکونو او وسله والو په نښته کې ۱۱ وسله والو طالبانو ته مرګ ژوبله اوښتې ده.
د ننګرهار امنيې قومندانۍ مطبوعاتي مسوول حضرت حسين مشرقيوال کليد ته وويل، چې تېره شپه ناوخته د سرخرود ولسوالۍ په کړسو امنيتي پوسته باندې وسله والو ډله ييز بريد ترسره کړی، چې د افغان ځواکونو له کلک مقاومت سره مخ شوی او په پايله کې ۵ وسله وال وژل شوي او ۶ نور ټپيان دي.
مشرقيوال وايي، په دغه نښته کې افغان ځواکونو ته هېڅ زيان نه دی اوښتی.
د امنيې قومندانۍ وياند دغه راز وايي، چې افغان ګډو ځواکونو د پچيراګام ولسوالۍ په مربوطاتو کې د روانو شاهين شل عملياتو په جريان کې يو شمېر چاودېدونکي توکي نيولي او له منځه يې وړي دي.
وسله والو طالبانو تر اوسه په دې اړه رسنيو ته څه نه دي ويلي.
