د غزني امنيتي چارواکي وايي، د غزني ښار د دويمې امنيتي حوزې اړوند د پوليسو د شپږم ماموريت د مشر پر موټر تېر ماښام چاودنه شوې، چې په پايله کې يې د ماموريت مشر له يوه ساتونکي سره ټپي شوی دی.
د غزني ولايت د امنيې قومندانۍ وياند فهيم امرخېل کليد ته وويل، چې د پوليسو د شپږم ماموريت د مشر ميرويس پر موټر پرون ماښام شاوخوا شپږ بجي د امير محمد خان کلا په سيمه کې د مقناطيسي ماين چاودنه شوې، چې په پايله کې يې نوموړی له خپل يوه ساتونکي سره ټپي شوی دی.
نوموړي د ټپيانو روغتيايي حالت د ډاډ وړ وبلله. (( له نېکه مرغه چې د ماموريت مشر نن سهار بېرته خپلې دندې ته ستون شو او ساتونکی يې تر درملنې لاندې دی حالت يې ډاډمن دی)).
تر اوسه پورې کومې وسله والې ډلې د دغه بريد مسووليت پر غاړه نه دی اخيستی.
د يادونې وړ ده، چې څو ورځې مخکې هم نا پېژاندو وسله والو يو نانوای په همدې سيمه کې وواژه او خپله په تېښته بريالی شوی و.
