جمهور رييس محمد اشرف غني وايي، د مجازاتو او مکافاتو اصل ته په پام به هغه کسان تقدير شي، چې د ارزګان د ساتنې او پرمختګ په برخه کې يې خدمت کړى او چا چې په خپلو دندو کې بې غوري او تنبلي کړې وي، له تشخيص وروسته به مجازات شي.
نوموړي دا څرګندونې تېر ماښام په ارګ كې د اروزګان ولايت له مشرانو سره په کتنه کې وكړې او د هغوى ستونزې او وړانديزونه يې واورېدل.
د جمهوري رياست مطبوعاتي دفتر څخه په خپره شوې خبرپاڼه كې راغلي، چې په پيل کې د ارزګان د ولايتي شورا رييس عبدالکريم خادمزي د نورو په استازيتوب د خبرو په مهال د دې ولايت د امنيت د ټينګښت په هدف هلته د پراخو عملياتو د ترسره کولو وړانديز وکړ او ويې ويل، څلورمه لېوا دې تجهيز شي او د ارزګان د ملي پوليسو تر مسلکي کېدو او وړتياوو لوړولو پورې دې د عامه نظم يوه لېوا دغه ولايت ته ورکړل شي.
هغه زياته کړه، د امنيتي ځواکونو د ښې همغږۍ له پاره دې د والي تر قوماندې لاندې د امنيتي ارګانونو واحده قومانده ايجاده شي.
د ارزګان د مشرانو د ويناوو او وړانديزونو له اورېدلو وروسته جمهور رييس غني وويل، چې د امنيت د ټينګښت لومړيتوب ته په پام د امنيت شورا غونډې په ارزګان ولايت کې د پراخو عملياتو پرېکړه کړې ده.
کلید ګروپ په ټویټر او فیسبوک کې وګورئ
