اجرائيه رئيس عبدالله عبدالله وايي، له حزب اسلامي سره د سولې هوکړه ليک په اړه نورو خبرو ته اړتيا نه شته او په وينا يې، هر وخت چې د سولې عالي شورا د دغه هوکړه ليک لاسليک ته چمتو شي، دوى ورسره کومه ستونزه نه لري.
نوموړي، چې نن يې د وزيرانو شورا په غونډه کې خبرې کولې، هغه ټولې ګنګوسې رد کړې، چې ويل کېدل دى له حزب اسلامي سره د سولې مخالف دى.
عبدالله زياته کړه، چې دوى له اوله هم سولې ته ژمن وو او اوس هم د وروستيو مسايلو په اړه له نن وروسته خبرو ته اړتيا نه شته.
د حزب اسلامي د شوراګانو وياند حشمت الله ارشد كليد ته وويل، چې د سولې هوكړه ليك نهايي شوى او ټاكل شوې د راتلونكې پنجشنبې په ورځ د افغان حكومت او حزب اسلامي ترمنځ لاسليك شي.
ټاکل شوې وه، چې له حزب اسلامي سره د سولې هوکړه ليک له لوى اختره وړاندې او يا هم د اختر په ورځ لاسليک شي، خو دغه كار د نامعلومو دلايلو له کبله وځنډېده او داسې ويل کېدل، چې اجرائيه رياست يې مخالفت کوي، خواوس چارواکي وايي، چې په روانه اونۍ کې به دغه هوکړه ليک لاسليک شي.
