د پکتيا مرکز ګردېز او ډنډپټان ولسوالۍ تر منځ د غځېدلې ۱۰۵ كيلومتره لارې د بيارغونې چارې پيل شوې، چې د ټولګټو چارو وزارت له لوري ورته ۱۹۹ ميليونه افغانۍ ځانګړې شوې دي.
د پکتيا مرکز ګردېز او ډنډپټان ولسوالۍ تر منځ د غځېدلې ۱۰۵ كيلومتره لارې د بيارغونې چارې پيل شوې، چې د ټولګټو چارو وزارت له لوري ورته ۱۹۹ ميليونه افغانۍ ځانګړې شوې دي.
د ټولګټو چارو وزارت د مرستيال انجنير احمدشاه وحيد په خبره، دا لويه لاره به په اساسي ډول رغېږي، چې څارنه به يې د اړوند رياست او ولايتي چارواکو له لورې په دقيق ډول کېږي.
نوموړي پکتيا ته د خپل کاري سفر په ترڅ کې ژمنه وکړه، چې د پکتيا اړوند ځينو نورو لويو لارو باندې به هم په نږدې راتلونکي کې کار پيل کړي.
انجنير وحيد د پکتيا مرکز ګردېز او غزني تر منځ، د لجې منګل او ځاځي اريوب ولسواليو ته غځېدلو لارو د جوړېدو ژمنه وکړه.
دی زياتوي، چې دغه راز د غزني او ګردېز تر منځ د لويې لارې جوړېدل هم د دوى په لومړيتوبونو کې دي.
د ټولګټو چارو وزارت معين وايي، چې د کابل ـ ګردېز تر منځ غځېدلې لويې لارې د بيارغونې په اړه به هم ډېر ژر اقدام وکړي.
د پكتيا د مرکز ګردېز او سرحدي ولسوالۍ تر منځ لويې لارې د جوړېدو چارې په داسې حال کې بيا پيلېږي، چې په جوړېدو يې نږدې درې کاله اوړي.
دا لاره ګردېز او د خيبر پښتونخوا پاړا چينار سيمه سره نښلوي.
د دې ولايت اوسېدونکو او سوداګرو يې په وارونو، وارونو د دې لارې د اساسي جوړېدو غوښتنې کړې دي او تر څنګ يې دا غوښتنه هم کېږي، چې دا لاره دې ترانزيټ شي، تر څو د کراچۍ بندر او ګاونډي هېواد پاکستان د نورو ښارونو وارداتي توکي تر کابل او له افغانستانه صادراتي توکي پاکستان ته په اسانۍ پرې ولېږدول شي.
کلید ګروپ په ټویټر او فیسبوک کې وګورئ
