افغانستان د اسيايي لوبو د کرکټ په سياليو کې نيپال ته په ماتې ورکولو سره نيمه پاى لوبې ته لاره پيدا کړه. اسيايي لوبې د جنوبي کوريا په انچيون ښار کې روانې دي، چې له افغانستان څخه د کرکټ او فوټبال په ګډون د ګڼ شمېر لوبو لوبغاړو پکې برخه اخيستې
افغانستان د اسيايي لوبو د کرکټ په سياليو کې نيپال ته په ماتې ورکولو سره نيمه پاى لوبې ته لاره پيدا کړه.
اسيايي لوبې د جنوبي کوريا په انچيون ښار کې روانې دي، چې له افغانستان څخه د کرکټ او فوټبال په ګډون د ګڼ شمېر لوبو لوبغاړو پکې برخه اخيستې ده.
د افغانستان د كركټ بورډ وياند فريد هوتك كليد ته وويل، چې د افغانستان د كركټ الف لوبډلې نن سهار وخته له نيپال سره لوبه ترسره کړه.
د هغه په وينا، ددې لوبې پچه نيپال وګټله او لومړى يې د توپ اچونې پرېکړه وكړه.
نوموړي زياته كړه، چې د افغانستان د كركټ الف لوبډلې په ټاکل شويو ٢٠ اورونو کې د لسو لوبغاړو په سوځېدو ١١٩ منډې جوړې کړې او نيپال ته يې د ١٢٠ منډو هدف ورکړ.
هوتك وويل، د نيپال د كركټ ملي لوبډلې ياد هدف ترلاسه نه شو کړاى او په شلو اورونو کې يې د ٧ لوبغاړو په سوځېدو ١١١ منډې جوړې کړې او افغانستان دا لوبه د ٨ منډو په توپير سره وګټله.
افغانستان به سبا ته د دې سياليو په نيمه پاى لوبه کې له هانګ کانګ سره لوبه وكړي.
کلید ګروپ په ټویټر او فیسبوک کې وګورئ
