د امريکا جمهور رييس بارک اوباما يو ځل بيا د افغانستان د جمهوري رياست له دواړو کانديدانو سره خبرې کړې دي. پژواك د سپينې ماڼۍ د وياند جوش ارنېسټ د خبرو پربنسټ چې په واشنګټن کې يې خبريالانو ته كړي ليكلي، چې جمهور رييس بارک اوباما پرون د جمعې
د امريکا جمهور رييس بارک اوباما يو ځل بيا د افغانستان د جمهوري رياست له دواړو کانديدانو سره خبرې کړې دي.
پژواك د سپينې ماڼۍ د وياند جوش ارنېسټ د خبرو پربنسټ چې په واشنګټن کې يې خبريالانو ته كړي ليكلي، چې جمهور رييس بارک اوباما پرون د جمعې په ورځ له دواړو افغان کانديدانو سره د ټېلېفون له لارې خبرې کړې دي.
هغه زياته کړه، چې د دې اړيکو پر مهال درې واړو مشرانو د جمهوري رياست ټاکنو د دويم پړاو د رايو د بيا شمېرنې او څېړنې پر پروسې خبرې کړي.
نوموړى وايي، چې جمهور رييس بارک اوباما له دواړو افغان کانديدانو مننه وکړه، چې د ټاکنيزو لانجو هواري لپاره د ملي يووالي حکومت او د رايو د بيا څېړنې په اړه پرېکړې ته سره ورسېدل.
اوباما له دواړو کانديدانو وغوښتل چې د ملي ګټو لپاره په ګډه د يوه حکومت په جوړولو کار وکړي.
هغه دغه راز دواړو کانديدانو ته په ډاګه کړه، چې د ټاکنيزو لانجو د هواري لپاره پر شويو پرېکړو عملي وکړي او د دې پرېکړو د عملي کولو لپاره خبرو او مذاکرې ته ادامه ورکړي، څو افغان ولس د ټاکنو پر پروسې باور وکړي .
اوباما يو ځل بيا په ډاګه کړه، چې هېڅ دليل دې لپاره نشته، چې د ټاکنيزو شخړو پر مهال دې د اساسي قانون پر ضد ګامونه پورته کړى شي.
هغه له دواړو کانديدانو وغوښتل چې په ديموکراتيکه توګه په افغانستان کې د واک د لېږد پروسه په برياليتوب سره ترسره کړي.ـ
د يادونې وړ ده چې د امريکا د بهرنيو چارو د وزير جان کيري په منځګړيټوب دافغانستان د جمهوري رايست د دويم پړاو ټاکنو لانجه په دې هواره شوه چې د ملي يووالي حکومت د جوړولو ترڅنګ د ټولو رايو بيا څېړنه کېږي.
له تېرې اونۍ راهيسې دا پروسه پيل شوې ده، خو په دې مينځ کې دوه ځل د رايو بيا څېړنه د دواړو کانديدانو د ټيمونو ترمنځ د اختلافاتو له امله ځنډېدلې ده
کلید ګروپ په ټویټر او فیسبوک کې وګورئ
