د چارواكو د بې غورۍ پايله

د تارسيان او بلينكلي شركت له لسو كالو راپدېخوا د ملي اردو د يونيفورمونو او جمپرونو د توليد په برخه كې كار كاوه او د زرو تنو ښځينه كاركوونكو په مټ يې د ملي اردو د اړتيا وړ ۵۰ فيصده يونيفورمونه توليدول، خو د چارواكو د نه پاملرنې له كبله اوس دا شركت د ۷۰ تنو ښځينه كاركوونكو په درلودلو سره د ښځينه جامو په توليد بوخت دى او زيات شمېر كاركوونكې يې بېكاره شوې دي.

د تارسيان او بلينكلي شركت له لسو كالو راپدېخوا د ملي اردو د يونيفورمونو او جمپرونو د توليد په برخه كې كار كاوه او د زرو تنو ښځينه كاركوونكو په مټ يې د ملي اردو د اړتيا وړ ۵۰ فيصده يونيفورمونه توليدول، خو د چارواكو د نه پاملرنې له كبله اوس دا شركت د ۷۰ تنو ښځينه كاركوونكو په درلودلو سره د ښځينه جامو په توليد بوخت دى او زيات شمېر كاركوونكې يې بېكاره شوې دي.

شيلا د دې شركت يوه پخوانۍ ګنډونكې ده چې اوس د ښځينه جامو د پاتن جوړولو په برخه كې كار كوي.

هغه وايي، ډېره خواشينې په دې ده چې د دې شركت د مشر له زياتو هلو ځلو او د جمهوررئيس له ژمنو سره سره دا شركت له ركود سره مخ شو او د دوى زياتو همكارانو چې د يوې مړۍ حلالې روزۍ د برابرولو لپاره يې كار كاوه، خپل كار له لاسه وركړ او اوس له ډېرو اقتصادي ستونزو سره مخ دي.

شيلا زياتوي، د دې شركت چاپېريال د ښځو لپاره آن د كورني چاپېريال په څېر خوندي دى ځكه چې ټولې كارګرانې يې ښځې دي او د كورنيو نارينه د خپلو ښځو او خويندو هېڅ مخه نه نيسي.

دا شركت د خپل كار په لار كې اوس هم له خنډونو سره مخ دى، كه څه هم ډېرې ښې ښځينه جامې لكه سر پتلوني، مانتو، كرتۍ او لمن د فصلونو برابر په ښو ډيزاينونو جوړوي، خو د خرڅلاو لپاره يې يوازې يو دوكان لري.

د شيلا په وينا، تېر كلونه د دوى معاشونه ښه او د قناعت وړ وو او آن تر ۸۰۰۰ افغانيو به يې معاش اخيسته او ترڅنګ يې د خوراكي توكو كوپون هم درلود، خو اوس د يوې كاركوونكې تر ټولو لوړ معاش ۵۰۰۰ زره افغانۍ دى.

د دې شركت مشر حاجي نصر الله رحمتي وايي، دوى داسې ښځې په كار ګمارلې وې چې ګنډل يې هېڅ زده نه وو، خو دوى ورته د دريو مياشتو لپاره د خياطۍ د زده كړې كورسونه په لار واچول: (( ځكه چې دا ښځې د دې سيمې تر ټولو زياتې مرستې ته اړې ښځې وې او هېڅ اقتصادي مرستندوى يې نه درلوده.))

ياد شركت به پخوا د امريكايانو له لوري قراردادونه ترلاسه كول، خو دا قراردادونه ملي دفاع وزارت او كورنيو چارو وزارت پورې اړه لري او ياد وزارتونه خپلې د اړتيا وړ جامې په داسې حال كې له چين څخه واردوي چې د تارسيان په شركت كې سلګونه پايې د ګنډلو ماشينونه بېكاره پراته دي او د شركت د كاركوونكو له شمېره څخه تر نيمايي زياته برخه چې كونډې او بېوزلې ښځې دي، په ډېر بد اقتصادي حالت سره په كور ناستې دي.