په پکتيا کې يو شمېر ديني عالمان په دې هدف سره را غونډ شوي چې د ټولنې په ځينو محروميتونو او ناخوالو سره وغږېږي او په اړه يې حل لارې ولټوي. د يادو ديني عالمانو د ټولنې په لومړۍ غونډه كې د ټاکنو، د روغې جوړې، بيارغونې او د ښځو د حقونو په اړه خبرې وشوې.
په پکتيا کې يو شمېر ديني عالمان په دې هدف سره را غونډ شوي چې د ټولنې په ځينو محروميتونو او ناخوالو سره وغږېږي او په اړه يې حل لارې ولټوي.
د يادو ديني عالمانو د ټولنې په لومړۍ غونډه كې د ټاکنو، د روغې جوړې، بيارغونې او د ښځو د حقونو په اړه خبرې وشوې.
په هغه غونډه كې چې د دغه ولايت ديني عالمانو جوړه كړې وه د مولوی خواجه الدين په نوم يو تن ديني عالم وويل: (( دا زموږ يو مدني حق دی چې ټولنه جوړه کړو او له مخې يې مدني فعاليتونه ترسره کړو.))
نوموړي، د دې ټولنې د هدفونو په اړه وويل، له ديني ليدلوري به ټولنيزي ستونزې او پرمختګونه څېړي او په اړه به يې تصاميم نيسي.
مولوی معصوم جان چې د دې ټولنې بل غړی و، وويل چې په خپلو هدفونو كې يې، يووالي او سولې ته تر ټولو لومړيتوب ورکړی دى.
د مدني ټولنو ځينې فعالان د ديني عالمانو ناستې او مشورې د اوسنيو حالاتو لپاره ګټورې بولي.
د ياد ولايت يو تن مدني فعال دينه ګل غريب مل وايي: (( ديني عالمان په ټولنه کې بانفوذه پاتې شوي، نو دوی کولای شي، د راتلونکې په اړه غوڅې پرېکړې وکړي.))
غريب مل زياته كړه: (( ديني عالمان بايد راتلونکې ننګونې، سر له اوسه درک او په اړه يې تصميم ونيسي.))
نوموړي، د روان اخ و ډب د پای ته رسېدو په برخه کې هم د ديني عالمانو رول مهم ياد کړ او زياته يې کړه چې د پکتيا ديني عالمانو په دې لومړۍ غونډه کې د سولې په اړه خبرې وکړې.
غريب مل همدا راز وايي، که ديني عالمان يو ځل بيا د تېر تاريخ په څېر له خپل نفوذه ګټه واخلي، نو شونې ده چې په ټولنه کې ګڼ مثبت بدلونونه راشي.
پکتيا چې د جرګو د کور په نوم يادېږي، قومي مخور او ديني عالمان په کې د خورا نفوذ او باور وړ بلل کېږي. دا چې د دې عالمانو له لوري د ټولنيزو ستونزو د اواري په هدف يوه ټولنه جوړه شوې، د کتوونکو په نظر دا به د راتلونکې په اړه د تضمين يوه ښه او غوره لار وي چې ديني عالمان په ټولنيزو مسايلو کې راښکېل شي.
کلید ګروپ په ټویټر او فیسبوک کې وګورئ
