د امريکا جمهوررئيس بارک اوباما اعلان وكړ، چې راتلونکى کال به د افغانستان په اړه د ناټو سرمشريزه غونډه جوړه شي. بارک اوباما دغه اعلان پرون په واشنګټن کې د ناټو سازمان عمومي سرمنشي انډرس فوګ راسموسن سره تر ليدنې وروسته په يوه ګډه خبري غونډه کې وکړ.
د امريکا جمهوررئيس بارک اوباما اعلان وكړ، چې راتلونکى کال به د افغانستان په اړه د ناټو سرمشريزه غونډه جوړه شي.
بارک اوباما دغه اعلان پرون په واشنګټن کې د ناټو سازمان عمومي سرمنشي انډرس فوګ راسموسن سره تر ليدنې وروسته په يوه ګډه خبري غونډه کې وکړ.
هغه د افغانستان د ملي ځواکونو پر پرمختګونو او لاسته راوړنو ډاډ څرګند کړ او ويې ويل، چې د ټول هېواد د امنيت ترلاسه کولو لپاره چمتو شوي دي.
بارك اوباما وويل، دوى به هغه هدف ترلاسه کړي، چې د شيکاګو په کنفرانس کې يې ټاکلى و او هغه د افغان ځواکونو لخوا د ټول هېواد د امنيتي چارو ترلاسه کول او د عملياتو مشري پر غاړه اخيستل دي.
د امريکا جمهوررئيس زياته كړه، چې تر هغې وروسته به ايساف او ناټو ځواکونه له جګړه ييز ماموريت څخه د روزنې، مشورې او همکارۍ ماموريت ته واوړي.
اوباما ددې خبري غونډې پر مهال اعلان وکړ، چې د ۲۰۱۴ کال پر مهال به د ناټو د غړو هېوادونو سرمشريزه غونډه جوړه شي، چې پکې به له افغانستان څخه د نړيوالو ځواکونو پر وتلو او تر ۲۰۱۴ کال وروسته پر حالاتو بحث وشي.
کلید ګروپ په ټویټر او فیسبوک کې وګورئ
