كورنيو چارو وزارت په تېره اونۍ كې د ۴۵ تنو وسله والو مخالفينو، د ۱۴ پوليسو او ۲۶ ملكي كسانو د وژلو خبر وركړ. د كورنيو چارو وزارت وياند زمري بشري د يكشنبې په ورځ يوې خبري غونډې ته وويل،
كورنيو چارو وزارت په تېره اونۍ كې د ۴۵ تنو وسله والو مخالفينو، د ۱۴ پوليسو او ۲۶ ملكي كسانو د وژلو خبر وركړ.
د كورنيو چارو وزارت وياند زمري بشري د يكشنبې په ورځ يوې خبري غونډې ته وويل، چې د تېرې اونۍ په پرتله د ملكي خلكو په وژنه كې درې، د پوليسو په وژنه كې ۱۴ او په ترهګريزو بريدونو كې ۲۰ فيصده كموالى رامنځته شوى دى.
د بشري په وينا: په تېره اونۍ كې ۱۰۲ بېلابېلې جنايي پېښې رامنځته شوي، چې په تور يې ۴۹ كسان نيول شوي، چې ۲۹ فيصده كموالى ښيي او همدا راز د ۵۴۷ كيلو ګرامه نشه يي توكو د كاروبار په تور ۱۱ كسان هم نيولي دي.
نوموړي زياته كړه: ۵۷ خصوصي امنيتي كمپينۍ تړلې شوي، چې د نورو كمپنيو د تړلو چارې خورا په چټكۍ سره پرمخ ځي.
د كورنيوچارو وزارت همداراز وويل، چې د پخوا په پرتله د پوليسو له ليكو څخه د تېښتې كچه خورا كمه شوې ده.
د يادولو وړ ده، چې د پوليسو اوسنۍ شمېره يو سلو دوه ويشت زرو ته رسېږي، خو د كورنيو چارو وزارت چارواكي بيا وايي، چې دوى غواړي راتلونكى كال پورې ياده شمېره يو سلو څلور دېرشو زرو ته لوړه كړي.
کلید ګروپ په ټویټر او فیسبوک کې وګورئ
