د ننګرهار والي ګل آغاشېرزي د دې ترڅنګ، چې د دې ولايت په اچين ولسوالۍ کې د پاکستان اوسنۍ پولې سره د هيروين جوړونکو کارځايونو شتوالى
د ننګرهار والي ګل آغاشېرزي د دې ترڅنګ، چې د دې ولايت په اچين ولسوالۍ کې د پاکستان اوسنۍ پولې سره د هيروين جوړونکو کارځايونو شتوالى مني، وايي: ژر به يې پرضد په کابل کې مېشت د نېشه يي توکيو پرضد ځانګړي پوليس هوايي عمليات وکړي.
والي دا خبرې کليد ته په يوه ځانګړې مرکه کې وکړې او پرته له دې، چې د دې هيروين جوړونکو کارځايونو شمېر وښيي وويل: دا کارځايونه په غره ييزو سيمو کې دي.
شېرزي دغه راز وويل، چې په شېرزادو او خوګياڼو ولسواليو کې هم هيروين جوړېدل، چې افغان او بهرنيو ځواکونو د وروستيو عملياتو پر مهال يې نېږدې دولس دا کارځايونه له منځه يوړل.
په ورته وخت کې د نېشه يي توکيو پر ضد د مبارزې وزير ضرار احمد مقبل، چې پرون ننګرهار ته راغلى و، کليد ته په اچين کې د هيروين جوړونکو کارځايونو رد او پخلى دواړه ونکړ، خو ويې ويل: د نېشه يي توکيو پرضد ځانګړي پوليس يې د دې توکيو پرضد د هرډول عملياتو وړتيا لري.
څو ورځې وړاندې په ختيځ کې د سرحدي ځواکونو قومندان هم کليد ته د ننګرهار په سرحدي ولسوالۍ اچين کې د هيروين جوړونې د کارځايونو شتوالى منلى او ختمولو ته يې د هوايي ځواک غوښتنه کړې وه.
دې ولسوالۍ کې څو مياشتې وړاندې د يوه لوى هيروين جوړونکي مرکز په ويجاړولو پسې روسي او امريکايي کارپوهان او ځواکونه هم راغلي وو، چې په وينا يې: په لويه کچه نشه يي توکي يې له منځه يوړل.
کلید ګروپ په ټویټر او فیسبوک کې وګورئ
